G：紅館籌備咗三次都被取消，你點看待今次嘅考驗？
A： 好似所有香港人咁樣看待囉（笑），繼續做自己嘢、繼續 improve。其實都知道依個 show 一定會進行到嘅，我覺得依三年訓練到自己好多嘅耐性，因為我係一個好冇耐性嘅人嚟嘅。同埋一路做更多歌、籌備呢嗰 show 送俾大家。
G：之前有提過自己係工作狂，因為疫情，多咗時間同屋企人相處，咁依家工作同屋企人會點樣平衡？
A：我覺得自己係一個幾唔平衡嘅人嚟，一係就工作、一係就放假，我發現一工作就冇時間見朋友或者屋企人。啱啱取消依個 show 嘅時候，咁啱我嘅屋企人喺第二度返咗嚟，我就同公司講 take 一個 full break，因為發現已經兩年冇放假了，成日一做嘢就會唔記得晒啲時間，（醒覺）原來已經過咗咁耐。我覺得都開心嘅，可以同佢哋相處吓。
G：之前有《3am》、《tonight》、《Everyday》，今次推出《tomorrow》，歌名都係同時間有關，點解鍾意用時間依個概念？
A：其實都好得意地，寫咗好多首歌，出咗好多首歌，發現自己歌名全部都時間有關，我記得係其中一個 fans 提出。我都解釋唔到，可能成日被人催交 deadline 掛（笑）。
G：作為一個創作歌手，你覺得最困難嘅地方喺邊度？
A：最困難嘅地方係搵時間去做下一隻歌，當自己啱啱入行做創作歌手嘅時候，其實有好多時間去創作。嗰陣時已經有前輩話過畀我聽，我一定要喺入行之前寫好多歌，因為你之後會越嚟越冇時間。我諗去到第三隻 album，就開始發現依個現象啦。唔係話趕唔切下一隻寫乜嘢，係你冇時間去感受生活。好多時候創作靈感源自於，除咗想像力之外，親身、五官去感受嘅，依個都係點解我之前放咗幾個月假嘅原因，因為自己好想去感受生活囉。
G：之前以作曲為主，亦都嘗試開始作詞，覺得作詞方面好唔好玩、有冇挑戰性？
A：其實我從來冇試過作詞㗎，我嗰啲詞真係 for demo 版。最初嘅去寫歌嘅時候，因為好多嘅作曲人都唔會寫詞，就算「啦啦啦」都已經寫咗一首歌出嚟。其實點解會去創作音樂，因為覺得有啲嘢想講、有啲嘢想表達，同埋我覺得每一首歌都有佢嘅feeling、佢嘅靈魂，去存在嘅一個原因。開始去填詞嘅時候，都知道啲詞唔會用㗎啦，之後先有啲同事話不如出吓啲 demo 版，demo 又有同大家 connect 嘅一個共鳴，所以我嘅詞先面世。
G：點樣塑造自己嘅曲風，令人一聽就感覺依首歌好 AGA？
A：我覺得寫歌係一個 soul searching 嚟㗎，其實係尋找自己嘅方法，好多 singer-songwriter 都係過程中慢慢搵到自己。因為我都會遇到個問題，就係當我啱啱開始寫歌，我唔會太注重我想成為一個點樣嘅 artist。其實最初唔會諗自己會做幕前，所以啱啱開始嘅時候，淨係會 focus 寫一個點樣嘅故事，想寫啲咩 feeling 出嚟。我以為自己係可以唱 rock 嘅，慢慢知道自己把聲唔啱唱嗰類型嘅音樂，咁慢慢去尋找自己嘅道路。當初想像自己會成為嘅一種 artist，到頭來係 absolutely 唔係嗰 type，所以我覺得都係創作有趣嘅一部分。
G：點解會想向國際推廣廣東歌？
A：啱啱入行嘅時候，唔會諗做廣東歌先，自己啱啱開始寫歌都係寫英文或者寫國語，因為嗰 language 比較容易去 carry。但係廣東歌會搵到另外一種挑戰性，依個 language 係好值得去研究，因為覺得好 challenging。點樣將自己識得嘅音樂或者鍾意嘅音樂變成自己 character 嘅廣東歌，咁自己慢慢搵到方法去 combine 「AGA type」 嘅 R&B 同廣東話，可以搵到嗰 balance。
開始做自己第一個 tour 時候，去咗更加多地方，覺得自己做嘅嘢比我想像中更加有意義同影響力。同埋會見到有人將自己寫嘅歌嘅歌詞變咗做 tattoo，成個背脊紋晒歌詞，咁我就會覺得 that’s the power of music。當你喜歡一首歌嘅時候，唔係淨係話佢好聽囉，係一個精神支柱。好似我啱啱寫嘅新歌《tomorrow》，諗住去鼓勵吓自己，睇唔到聽日、（見到）最低潮嘅自己有咩想同佢講，但係你做咗一樣咁嘅嘢嘅時候，別人經歷緊同一樣嘢嘅時候，就會搵到佢哋嘅共鳴，而我覺得音樂係冇 language 之分，所以 that’s why 我覺得當除咗香港以外嘅人喜歡我嘅音樂嘅時候，會覺得我地有連結。
G：有好多作品都係同愛情有關，現階段嘅愛情觀係點呢？
A：我會覺得心靈係最重要嘅，溝通好緊要啦，我會喜歡大家有啲小 challenge 畀大家，唔會成日都 say yes。我覺得某程度上，重要嘅係當你遇到一個人令自己去 improve，亦都可以令到對方進步，令到大家變成更好嘅人，就係一個 good relationship。
G：如果緣份到，係咪都 ready for 下一段 relationship？
A： definitely!
G：工作、家庭、愛情，係依家會點排次序呢？
A：我會擺工作排第二，第一就係家庭，第三係愛情。我覺得唔使特別去追求（愛情），因為你遇到嗰個人嘅時候就會冇咁 100% 喺事業上面，所以依家我覺得要 focus 喺自己想做嘅事先囉。
G：有冇試過係啲最特別嘅地點或者情境下寫歌？
A：呢嗰幾搞笑，Umm......我喺飛機上寫歌囉，長途飛機嚟嘅，（喺途中）首歌就完成咗，同埋有小小好唔同我自己會寫嘅風格。我通常都會好 inspired by 一啲周邊嘅事物，可能嗰個時候去旅行嘅心態。所以擺我喺唔同嘅地方就會寫到唔同感覺嘅歌。
G：公司嚟緊宣布會有巡迴演出，你最期待會去邊度呢？
A：最期待啊......日本（笑），想去旅行囉，其實我嘅音樂好 inspired by 日本嘅歌，因為我細個聽好多日文歌，我又成日飛去日本睇 show 嘅，如果可以喺日本開 show 呢，咁就好啦。
G：如何喺疫情吓鼓勵自己保持正面心態？
A：我覺得正面嘅心態係好重要嘅，我自己都有研究過依個議題，咁我好 sure 運動係一定幫到啦，早瞓啦，我改咗夜瞓依個習慣，同埋適當嘅時候要見朋友， work-life balance係重要嘅。
-
Director @galaxyman
Photographer & Stylist @c.tszon @kizerot
Assistant @dameno_c_ @crazyjnym
Video @jk.wong
Make up @ricky_now_nowHair @garysunhair
Interview @keung.jai
Design @romance.isover
Wardrobe 1 @harveynicholshk
Wardrobe 2 @hbxhk @marineserre_official
#GMAG封面人物
#AGA #江海迦 #Tomorrow
另有限定親筆簽名海報贈送活動詳情
請參閱 https://instagram.com/gmagazine.hk
-
想睇更多 Gmagazine 最新潮流資訊！？
► Follow IG: https://instagram.com/gmagazine.hk
► Subscribe Youtube: https://youtube.com/c/GMAGHK
