Q: 點樣喺工作同家庭中取得平衡？
Yu: 我冇取得平衡過，我覺得有陣時突然間要做阿媽時就係阿媽。但係反而會爭取時間俾自己，可能係屋企啦，你已經搞掂曬佢哋啲嘢啦，可能就會同佢講依家阿媽要自己私人時間，你唔好嚟煩我啦。咁我可能就會開個酒飲吓咁樣，閂埋房門，自己睇吓YouTube咁樣囉。
――――――――――――――――――――
Q: 有冇試過工作同小朋友重要日子撞咗期？
Yu: 咁都要唔做嘢去睇佢嘅，盡量安排，時間嘅嘢好死嘅姐，咁我可以約第二日架嘛，如果遇著佢畢業嘅話。但係如果係一個普通去表演個啲，咁我就睇吓點，睇吓個表演佢想唔想我喺到囉。
――――――――――――――――――――
Q: 咁兩位小朋友依家會唔會對你嘅依賴性好重？
Yu: 一時時啦，佢想同佢啲friend傾計嘅時候就唔依賴性，但可能生活上某啲事，就真係要阿媽決定嘅，就會囉。但係依家都大架啦 可以問佢想唔想、鍾唔鍾意、O唔OK。
――――――――――――――――――――
Q: 作為一個單親媽媽喺背後支持你嘅信念係咩呢？
Yu: 背後嘅信念就係我兩個女囉，佢支持我咁樣繼續行落去囉。其實唔係，姐係真實啲嚟講其實呢，我會覺得你都帶到佢嚟依到啦，希望可以帶佢進入社會嘅時候，你係從中灌輸一啲訊息啊、價值觀啊俾佢地，就係咁簡單，冇乜堅持，一路做落去囉，如果唔係點姐，扔咗佢咩唔通。
――――――――――――――――――――
Q: 18年後再唱《大孩子》喺心態上有冇咩唔同呢？
Yu: 有嘅，因為唱歌你係咁唱就係咁樣唱架嘛，咁幾多年後你嗰個唱法好難會唔同。但係喺情感上面真係隨住經歷啊，你所發生嘅事啊，嗰句說話、嗰句歌詞，可能有啲情感可以放到落去喎。以前可能淨係唱，唱簡單啲唱咗佢，或者監製叫你激動啲嘅依個位 ，但係可能淨係表情上面演繹出嚟，依家可能更加理解個歌詞咁樣囉。
――――――――――――――――――――
Q: 知道你2022年會有新作品推出啦，可唔可以透露多啲俾我地知呢？係關於啲咩架？
Yu: 其實仲同監製去傾緊嘅，但係大家都有啲共識嘅，可能會係一啲故事嘅起承轉合嘅位，同返我以前嘅音樂有返啲關聯，咁但係仲傾緊嘅時候 ，所以未能夠好實在咁答到你。即係好似會有part1嘅大孩子，可能之後會有Part 2嘅另外一個自己咁樣囉，咁但係大家都仲夾緊嘅。
――――――――――――――――――――
Q: 依家嘅感情觀係點呀？
Yu: 愛自己先啦，總之任何嘢發生都好，衰啲咁講，我覺得做人應該可以自私啲嘅。即係你愛左自己先，先會吸引到人去愛你架嘛。了解左自己先啦，然後你知道自己鍾意啲咩、唔鍾意啲咩，咁當有個人出現你先會發現原來都夾架喎，又或者，啊原來唔夾嘅，咁樣囉。
――――――――――――――――――――
Q: 咁如果依家有一個合適嘅人選會唔會接受新嘅感情呢？
Yu: 呢個係幻想嚟架喎，答唔到你住喎暫時。我會變架喎其實，我依家不停咁變緊我自己嘅要求。
――――――――――――――――――――
Q: 咁依家嚟講，邊一個元素會擺喺第一位？
Yu: 識得欣賞你，即係或者好願意去了解你，可能每個人都會有唔同嘅性格嘅，咁但係佢唔係淨係話我覺得咁樣好喎，啱你喎，將一啲佢鍾意嘅嘢加喺你身上，即係嗰啲就唔得啦，即係唔可以因為佢要求你變就去變咁樣，反而因為係你所以佢鍾意你咁樣。因為我覺得因為呢個人嘅喜好改變自己，咁佢都唔係真係鍾意你啦。
――――――――――――――――――――
Q: 咁但係你依家都無話好渴求，或者好想有一段感情咁樣？
Yu: 我依家冇渴求過，我直頭係覺得依家，一個人都好好咁樣，自己一個人都幾開心嘅，跟住然後亦都分到好多時間俾我啲朋友嘅，亦都俾咗屋企人啦，俾咗兩個女，同埋工作啦。咁我覺得已經夠啦，如果要再多餘咁諗嘅話，有先算啦。
――――――――――――――――――――
Q: 咁如果你有一個機會，你想改變啲咩呢？
Yu: 因為有以前先會有依家，所以我覺得依個時間線係啱嘅，所以冇嘢冇乜嘢要改。
#GMAG封面人物 #十二月 #趙頌茹
December Feature @yuchiu24x7
Director @galaxyman
Photographer @c.tszon @kizerot
Videographer @hermanhim
Styling @ckslot @c.tszon @kizerot
Styling assistant @yuenyan.c
Make up @ching2.justcy
Interview @keung.jai @_dameno_c
Wardrobe :
@prada @jw_anderson @marineserre_official @maisonmargiela
@jilsander @telfarglobal @justineclenquet
――――――――――――――――――――
想睇更多 Gmagazine 最新潮流資訊！？
► Follow IG: @gmagazine.hk [ https://instagram.com/gmagazine.hk ]
► Subscribe Youtube: GMAG HK [ https://youtube.com/c/GMAGHK ]