Q：見你日常穿搭偏向韓系，會不會同之前係韓國做練習生有關？你覺得韓系穿搭既 tips 係咩？
細貓：我覺得某程度上係，我諗我中學既時候對於穿搭都未係好講究，而大學嘅時候已經係韓國，所以我覺得自己嘅穿搭同審美都係受韓國影響比較多。反而練習生個邊令到我穿搭頹咗，因為大家練習嘅時候，都係黑色衫加外套，就算其他時候都係運動衫，練習完就換衫，笠返件外套，所以最緊要就係件外套，裡面件衫就好求其嘅。如果有乜事，即刻笠返件外套就可以見人啦。
而其實韓國嘅男仔鐘意著裇衫，咁我自己受個到影響，所以而家我自己都鐘意著恤衫多啲嘅，韓國嘅裇衫款式比較多，而且都唔介意著一啲比較鮮艷嘅顏色，甚至係戴帽。香港最避忌嘅綠色帽，但韓國人都唔會介意。
――――――――――――――――――――
Q：疫情完咗之後最想做咩？
細貓：最想去東南亞旅行，因為從來都未去過。好似泰國、越南，好多香港嘅朋友應該都去過，基於自己係韓國 6、7年，甚少去到啱啱講既國家。因為自己平時係韓國返黎香港，就算飛，去得最多都係日本同台灣。
――――――――――――――――――――
Q：近期有冇咩計畫籌備緊？
細貓：近期啱啱錄咗首新歌，跟住拍攝緊一個真人show，希望有機會 10 強到，去韓國再受訓，然後就計劃緊再下一首歌，同埋之後希望同唔同既前輩合作。
――――――――――――――――――――
Q：黎緊出既新歌係咩類型既歌？
細貓：新出嘅歌係慢歌，因為之前出咗首快歌。今次係一啲自己未試過嘅種類，換咗一種新既演繹方法，希望觀眾鐘意啦。
――――――――――――――――――――
Q：同 Mirror 擦身而過你覺得係一種機遇定係挑戰？
細貓：有好有壞啦，自己之前都有係組合出過道，都明白組合既力量、團隊嘅力量，無論係音樂方面會更多元化，個力量會大啲，同埋會吸引多啲受眾，因為唔同既成員會令到組合既關注度上升啦。但係自己讀完音樂既時候，對於音樂有好多諗法既時候，個人出道既時候，自由度會大啲。反而係音樂方面會更加有野心，做好更加多既音樂。
――――――――――――――――――――
Q：如果有機會同 Mirror 成員合作出歌，你最想同邊個合作？
細貓：嘩！好難講喎！其實我自己覺得有幾位啦，如果合作會特別有張力嘅，例如同 Anson Lo 都係唱跳型，咁我地可以做到一啲好男團形式嘅音樂。如果同阿 JER 合唱嘅話，我會覺得幾得意嘅，阿 JER 嘅爆發力好勁，咁我係偏啲薄啲既聲，我諗玩出黎嘅音樂都幾特別。其他 rap 個啲成員都非常喜歡啦，因為自己唔係啲 rap 的好犀利嘅人，始終之前既作品都會有 rap ，亦都有人唱，咁如果可以有個化學作用既話，都幾得意嘅。
――――――――――――――――――――
Q：平時寫歌既題材同靈感從何而來？
細貓：觸景生情啦，有時候會特登睇電影，有啲感受嘅時候，積積埋埋就會寫，咁我就習慣將啲負面嘅情緒累積，就一次過寫嘅，通常就寫兩、三首。當然如果要交功課嘅話，就真係花多啲時間去睇電影，凌晨出去跑下步呀，感受下就有靈感再寫。
――――――――――――――――――――
Q：參加咗《敗者重生戰》，對今次比賽有冇咩期望？
細貓：其實參加《敗者重生戰》最主要嘅目的就係去學野啦，最想就係跟唔同嘅前輩、老師學野，始終經驗尚淺。咁我覺得可以跟到小肥老師、學而老師學唱歌啦，仲有 MasterMic 老師教 rap 啊，仲有天佑老師、張敬軒老師教演戲，同埋 Gareth 係一個好犀利既監製。今次都已經玩咗一半到啦，其實都已經係獲益良多，好彩有參加，同埋學咗好多野，嚟緊再更加俾心機去做更加多嘅表演俾觀眾睇？
――――――――――――――――――――
Q：咁依個比賽有冇啲比較深刻嘅片段可以提前同我地分享？
細貓：深刻嘅片段就係同隊友們合作啦，姐係大家往往都好客氣，覺得：「細貓出咗道一陣啊，要跟佢學野。」其實真係反而係，我係跟返大家學野，因為真係每個人既特質，同埋佢哋嘅優點係三年嚟大家都保持進步，睇到佢地我都會反思自己仲未夠，所以同其他參賽嘅造星 1 兄弟再玩返，係令到我最深刻，都令我好開心。
――――――――――――――――――――
Q：參加完全民造星到依家，都差唔多3年時間，反思依段時間，你覺得有冇咩遺憾可以再做好啲？你呢？（觀眾）你做過最遺憾既事係咩？
細貓：係技能方面，唱歌、跳舞有小小遺憾嘅，其實每個舞台，或者錄一首新歌，都有啲不足嘅地方，但係正正就係依啲不足嘅地方令我成長，我自己又係覺得冇依啲遺憾唔會有依家嘅我。雖然有美中不足嘅地方，但係人生就係咁囉。
所以我嘅遺憾係無辦法 100% 將舞台展現俾觀眾，
咁你（觀眾）既遺憾係咩呢？
――――――――――――――――――――
#GMAG封面人物 #十一月 #應智越 #細貓
November Feature @mr_littlecat
Director @galaxyman
Stylist @ckslot
Photographer @c.tszon @kizerot @hermanhim
Videographer @hermanhim
Hair @haffmancheng
Make up @karmenkwok
Interview @keung.jai
Styling assistant @_dameno_c__
Wardrobe :
Maison Margiela | Acne Studios | Dr. Martens |
Prada | Eytys | 1017 ALYX 9SM | Needles |
――――――――――――――――――――
想睇更多 Gmagazine 最新潮流資訊！？
► Follow IG: @gmagazine.hk [ https://instagram.com/gmagazine.hk ]
► Subscribe Youtube: GMAG HK [ https://youtube.com/c/GMAGHK ]